人世間無聲个音樂裡背，放等一張相片。𠊎个阿姨著白色个洋裝，日頭照在伊个臉上，伊目珠聚聚，企在嬰兒仔車隔壁，𠊎坐在車仔裡背，阿姨个手握緊推車。𠊎等站在一棵香蕉樹下背，附近有一條細小河壩，河水親乾淨。

     毋過，等到𠊎 讀小學个時候，媽媽正同𠊎講，後來阿姨毋小心，鬆開伊个手，𠊎坐在嬰兒仔車裡背，四輪車順著下坡路滑過夥堂，繼續溜過傾斜个水泥路面。阿姨毋係無喊救命，伊係無辦法講話个人，發癲一樣，咿咿呀呀，手指指著往河壩脣跌落个四輪車，像一隻受到驚嚇个鳥，追著𠊎，阿姨个尖叫聲中，𠊎掉落充滿石頭个河壩，無水个冬天，𠊎个頭拿爆開。𠊎親像可以看到阿姨，站在河壩脣口，嘴無命个喊，救-人-呀！救-人-呀, 毋過，從伊个嘴底背跑出來个，毋係人話，係講毋出口个發驚，同目汁一樣，聽毋到个。

    該係無存在講話，也無存在文字个世界。簡單个手勢加上阿姨面上誇大个表情，裡背隱藏著數毋清个情緒波濤，奔流曲折，有時節又安靜固執，在伊無人知得个宇宙，當作伊个星星。

     該當時，有一些路過个中年男子，趕緊跳下河壩，同𠊎抱到醫療所。醫生趕緊包紮𠊎个傷口，媽媽來到醫療所个時節，伊無罵阿姨，可能係無責怪个關係，阿姨急忙對著媽媽用手語畫出千萬个星星，裡背包括阿姨面上个對毋起對毋起，𠊎毋係故，𠊎當驚，這種手勢，媽媽當想生氣，媽媽看等著𠊎頭拿包好个紗布，醫生講過三天回來換藥，拿等藥包，阿姨抱著𠊎走在媽媽旁邊，摸著𠊎面，親像在講，“要原諒阿姨哦，阿姨最惜阿耀估。”

     阿姨長得當美麗， 大家都講 伊可以去做歌星，毋過，這毋就係一種諷刺？ 美麗个細妹仔，聰明个思想，可以設計出時髦个衣服，當具備現代感个洋裝，伊也做得令人毋可思議个髮型。毋過，伊就係無辦法開口，伊一開口，大家就知得， 伊係無辦法成功个。這係伊个命運。

    阿姨同媽媽感情當好。 伊總係來𠊎等屋下幫忙做家事。媽媽身體有時節虛弱無力， 伊會騎腳踏車來煮飯，掃地。媽媽同阿姨用手比著𠊎毋了解个事，可能係阿姨開个美容院，生意毋知好毋好。爸爸養當多鳥仔，總係同伊等關在毋同个鳥籠裡背。鳥仔發出優美个聲音，有色彩个鳥仔，有熱帶个，有斑鳩，有麻雀，有七彩孔雀，黃鶯。佢等發出美妙个歌聲，抒發佢等个心情。只有阿姨， 伊个面上个表情，有時節會表現出基本个四个元素：喜怒哀樂----伊歡喜，伊生氣，伊悲傷，伊煩惱----如果人生个情緒可以用這四種表情包涵，如果心中个風景只有這幾種解釋个方式，伊个生命就會簡單盡多盡多。伊只有十隻手指頭。

     有時節，媽媽會同還吂尋到對象个細阿舅寫情書。媽媽同信紙攤在桌上，開始一筆一畫寫起來。阿姨親奇怪媽媽寫麼个東西。媽媽講，『寫阿舅係老實人，負責任，當煞猛做事。』媽媽个字歪來歪去，毋過在阿姨个世界裡背，這兜字可能無存在，忒複雜，忒抽象，無辦法傳達阿姨个心裡背想要講出个事情。愛情个詩篇，離阿姨更加遠。媽媽同阿姨講，『就係幫忙伊个阿哥介紹一個“門當戶對”个細妹仔。』在阿姨生命字典裡背，毋知有辦法查到“門當戶對”這隻字毋。

     國小二年生个時節，屋下門前停等一台白色个轎車，一个著烏色西裝个細倈仔下車，後背跟著兩個著旗袍个婦人家，伊等看係來係都市人，帶來親多禮物，有餅乾糖仔，有阿姨喜歡食个雞卵糕。細倈仔差毋多三十歲左右，比阿姨過老一些，看起來係老實人，拿等一本記事本，同爸爸媽媽寫親多字。佢看等阿姨个時節，有兜仔緊張，看等阿姨个目珠，又低頭下來，馬上又擎頭對阿姨比講：『食雞卵糕。遽遽食啊！』阿姨同佢在夥廳下食茶，手仔比來比去無停過，講了一下晝个話。𠊎感覺伊等係滿適配个，門當戶對个一對。

     細倈仔同佢屋下人離開个時節，阿姨送佢等行到大橋旁邊，日頭落山，田丘邊个椰子樹上背，滿滿个彩色个雲，照等阿姨个目珠。第一次看到阿姨个面色，忒紅忒靚。 𠊎行過去對阿姨比手：『你-愛-佢。』 阿姨捏等𠊎个手。𠊎緊喊，『阿—按痛哦。烏青了啦，烏青了啦。』

     幾个月過後，爸爸媽媽載𠊎去參加阿姨个婚禮。該日，阿姨著个婚紗當白，婚紗頭拿蓋仔裡被，嘴脣淡淡个紅色，伊本來个目珠就親大，現下又更加好看。姨丈牽著伊个手，用白色个手套仔包个，一桌一桌同大家人敬酒。姨丈親高大，英俊大方，係見過世面个人，阿姨行在起佢隔壁，像一个揚蝶仔。媽媽同共桌个大姨講，『嫁分忒老實个人，𠊎兜就毋使擔心个。』大姨講，『玉玫个性質忒直，希望以後毋會吵事就好。』媽媽講，『玉玫忒聰明，應該會愛惜伊个福氣。』

     放春假个時候，媽媽帶𠊎坐車仔去尋阿姨。遠遠看到阿姨伊等開个洗衫褲店。附近有一個平交道，堵好火車經過，柵欄放下來，平交道叮噹叮噹響器，等火車駛過去，柵欄收上來，伊等行過平交道，進去洗衫褲店。姨丈站在門口拿著大熨斗燙衫褲，阿姨站在後面同燙好个衫褲掛在衣架頂項。姨丈看到𠊎等，馬上放下熨斗，趕快跑到走廊來迎接，叫𠊎等趕快到廚房，然後從冰箱拿出汽水倒在杯仔底面給𠊎等。

     今這下係食潤餅个季節，親家母已經準備好親多菜放在圓桌上，白白个潤餅皮，疊當高。自家喜歡食个，用筷仔夾來放在餡餅皮上背， 配料有豆芽，豆干，蝦公，卵皮，蘿蔔仔絲，花生粉。阿姨講記得要放香菜，比較香。𠊎包當多來食，肚子忒鼓，差毋多行毋動。火車經過窗戶外面，親像發電影个時節，底片輪仔發出規律个聲音。面向火車个窗仔用木條釘死，所以看毋到火車一格一格穿過光線下面連成一條長長个驚奇，朦朦朧朧，發夢一樣。

     阿姨聽無到火車聲，火車當快駛過屋仔，廚房又安靜起來，只有三台洗衣機轉毋停个流水，一只老掛鐘，掛在壁上，鐘擺慢慢搖等，當晝頭个日頭，從屋頂个天窗落在𠊎等个面項，阿姨个嘴唇塗著紅色个口紅，手指甲依然係紫色个，同結婚以前一樣無變。伊真係厲害悿現代細妹仔，連洗衫褲也化妝。伊个面充滿自信，無半點做到當悿个樣仔。𠊎親像坐在電影院裡背，看阿姨演一齣無聲音个故事。

     食飽飯，𠊎等到二樓阿姨个房間休息。阿姨拿出伊个一本國語課本，『第二冊』，係國小一年生下學期讀个。伊打開書，又翻開放在桌上个鉛筆簿仔，拿等鉛筆寫字，一行一个字，同小學生一樣，連注音符號也寫。媽媽問阿姨，『做麼个寫國字？』 阿姨有兜猶豫。可能係羨慕姨丈寫得一手很漂亮个字。阿姨比，『𠊎想要學寫字。』 媽媽說，『寫得好漂亮。你很聰明，一定無問題个。』阿姨搖頭，把剛剛寫好个字全部都擦掉了。伊發出惱怒个聲音，『親醜个字呀。』然後，伊又一筆一畫重新把那行字再寫一遍。

     𠊎有閒个時節，會自己坐車到屏東去尋阿姨。親家母總係問𠊎食飽某？桌上有飯菜，自己來。 伊个姐妹都係師專畢業，現下在國小教書个。伊等在洗衫褲店幫忙，會問𠊎，『小朋友，你愛食冰嗎？公園附近賣个四果冰親有名哦。』

     姨丈問𠊎， 要吃嗎？他喊𠊎坐上機車帶𠊎去公園附近个冰店。𠊎們坐在公園旁邊，樹影被夕陽拖得很長。如果阿姨能來這片，應該會有多好，伊會拿等冰棒，目珠閃著歡喜个樣子，伊會站在公園个大榕樹下對𠊎講，想愛來公園散步，看池塘裡背个魚仔在蓮花影子裡背，自由自在。

     𠊎點牛奶冰，姨丈點咖啡，佢同一本書放在桌上。 佢同𠊎个溝通係用寫字个。佢問𠊎：『幾年級了？』𠊎寫：『已經五年級了。』 『聽你母親說你的成績很好。你喜歡看書嗎？拿這本書去看看。』佢寫个字親好看，用鋼筆寫地。很有力量，親像會透過白紙，滲透到紙个深處。他寫字很快，很像有很多情感要訴說。佢係從北部个大都市裡背高級个學校畢業个高材生。佢寫个字龍飛鳳舞，連做公務員个爸爸都輸分佢。 他个書上背寫著：『初戀』--作者：屠格涅夫。 𠊎寫：『初戀，寫什麼故事？』 姨丈寫：『寫生命的困苦與努力。還有精神上的慰藉。』 𠊎寫：『太難了。姨丈，我放棄了。』 姨丈笑等：『你的字比阿姨漂亮很多。』佢嘆了一口氣。『你阿姨就是愛漂亮，她不喜歡看書。』

     接著二年，阿姨生了一個倈仔同一個妹仔，二個細人仔都無聽力个問題。阿姨除到工作，還愛照顧細人仔，伊个國語課本，還係停留在三年級第五冊。伊永遠跳毋過去，也係伊永遠想停留在恁簡單个國語課本个故事裡背，該片只有細人仔在河壩邊野餐，也係鳥仔讚美春天已經來忒，可以在田丘放紙鷂，也係在海邊拈起來彩色个石頭，將石頭放在窗邊，暗晡頭用來發夢，永遠停留在十個手指可以揮灑出來个世界。

     阿姨逃走个原因𠊎等毋詳細。姨丈匆匆忙忙開車來到鄉下尋𠊎等，問有看到阿姨無。媽媽盡擔心，問姨丈講阿姨有做出嗎該傻事無。 姨丈个眉毛縮起來：『沒有。』 這兩個字寫得很用力，整張紙都破裂了，鋼筆墨水滲透到紙个內部。

     後來聽說阿姨留下了伊个表弟表妹，離開了洗衣店，一個人毋知道在哪裡流浪。 𠊎問媽媽說：『阿姨怎麼了？』

     有个情感，大家都知得，毋是講話，係關心，係愛。 有兜溫情，經過慢慢纏來个用心，用手指，滑過該兜濕濕个眼睛，鬆開緊張个手指，雖然無文字，無話語，也可以感覺心裡背个溫度。 這樣，複雜个情緒呢？

     外公也係操煩，每日騎腳踏車從內埔仔來屋下問媽媽阿姨到底在哪位，係毋係還要歸來伊个細人仔同先生身邊。

     阿姨每日洗等別人著過个衫褲， 用流水打走屙糟个味緒，再一來一往將皺皮燙直， 補好有坎个地方，將一个全新个自家，乾淨美化以後，掛在曬衣架上面，表面完美白潔，無怪怨个理由，掛在空中，無辦法行出世界。

     後來有接到阿姨從雲林鄉下偏僻个所在，寫來个幾隻字，阿姨个字歪斜，毋過可以了解伊自願為到媽媽，寫一封信，來報平安。

     伊現下住在雲林，開一家美容院，伊喜歡个人係一個毋會寫字个工人，在竹仔工廠做家具。

     親像看到阿姨同這個工人，站在雲林無邊際个田丘，夕陽落山，伊等用手比劃等簡單个話，比講今夜个天氣，天光日哪久剪頭拿毛，哪久去布店買布，為你做一件冬天个衫服。 阿姨毋使寫字忒。伊毋使讀該本困難个『初戀』--俄國小說家：屠格涅夫。